ប្រជាជនមិនទាន់ស្គាល់ពីតួនាទីបក្ស និង រដ្ឋាភិបាល

កាលណាប្រជាជនមានទុក្ខលំបាក ហើយមាននរណាមកជួយដោះស្រាយទុក្ខលំបាកនោះ ប្រជាជននឹងដឹងគុណចំពោះអ្នកដែលបានមកជួយព្រោះ ការដឹងគុណជាផ្នត់គំនិតរបស់ខ្មែរ គឺ ផឹកទឹកត្រូវនឹកដល់ប្រភព ហូបផ្លែត្រូវនឹកដល់អ្នកដាំ។ពាក្យស្លោកសម្រាប់ឃោសនាបោះឆ្នោត របស់គណបក្សប្រជាជន៖ទីណាមានទុក្ខលំបាកទីនោះមានគណបក្សប្រជាជនកម្ពុជាជួយ ដោះស្រាយ។ អ្នកដែលតែងមកជួយពេលប្រជាជនជួបទុក្ខលំបាកនៅពេលមានទឹកជំនន់ គឺមានតែគណបក្សប្រជាជន។ ដូច្នេះប្រជាជនត្រូវដឹងគុណគណបក្សប្រជាជន។ មន្រ្តីនិង អ្នកគាំទ្រគណបក្សប្រជាជនតែងនិយាយដូចៗគ្នាថា  គណបក្សប្រឆាំងបានតែថា មិនដែរធ្វើអ្វីសោះសម្រាប់ប្រជាជន ពេលប្រជាជនជួបទុក្ខលំបាក មិនដែរឃើញមុខគណបក្ស ប្រឆាំងមកជួយ ឃើញតែគណបក្សប្រជាជន ហើយគណបក្សប្រឆាំងពេលបោះឆ្នោត ទើបមកសន្យា ដូច្នេះសូមបងប្អូនមេត្តគាំទ្រនិងបោះឆ្នោតជូនគណបក្សប្រជាជនដែលតែងតែ មកជួយបងប្អូនជានិច្ចពេលបងប្អូនជួបទុក្ខលំបាក។ នៅក្នុងប្រទេសមួយមានរដ្ឋាភិបាលស្របច្បាប់តែ១ ហើយគណបក្សនយោបាយគ្មានសិទ្ធិ ប្រមូលចំណូលថវិកាជាតិដូចជាពន្ធដារ ថ្លៃឈ្លួលទ្រព្យសម្បត្តិរដ្ឋ ខ្ចីលុយនិងទទួលយកជំនួយ ពីរដ្ឋាភិបាលបរទេសក្នុងការធ្វើផ្លូវ ស្ពានជាដើមបានទេ គឺមានតែរដ្ឋាភិបាលស្របច្បាប់ តែមួយគត់ដែលមានសិទ្ធិទាំងនោះ។ ម៉្យាងវិញទៀត ថវិការជាតិមិនត្រូវបានចាក់ចែងឲ្យ គណបក្សនយោបាយយកទៅអភិវឌ្ឍន៍ប្រទេសបានទេគឺមានតែរដ្ឋាភិបាលតែប៉ុណ្ណោះ។ សមាជិកគណបក្សនយោបាយ ដែលជាសមាជិករដ្ឋសភា ឬ ព្រឹទ្ធិសភាអាចទទួលបាន ប្រាក់ខែពីរដ្ឋសភា និង  ព្រឹទ្ធសភាក្នុងមុខងាររបស់ពួកគេជាអ្នកតំណាងរាស្រ្ត ឬ សមាជិក ព្រឹទ្ធិសភា។ ម៉្យាងវិញទៀត មន្រ្តីរាជការ ប៉ូលីស ទាហាន ស្ថិតនៅក្រោមរដ្ឋាភិបាល មិនមែន ស្ថិតនៅក្រោមការអំណាចរបស់គណបក្សនយោបាយទេ។ សរុបមក គណបក្សនយោបាយ គ្មានសិទ្ធិប្រមូលចំថវិការជាតិ និង ទទួលថវិការទាំងនោះយកទៅអភិវឌ្ឍន៍ប្រទេសទេ ហើយគ្មានសិទ្ធិត្រួតត្រា មន្រ្តីរាជការប៉ូលីសទាហាននោះទេ គឺមានតែរដ្ឋាភិបាលស្របច្បាប់ តែប៉ុណ្ណោះ ។